Tata basa mangrupa ulikan jeung pedaran seluk-beluk kaédah basa. Obyék garapan tata basa ngawengku kaédah sora basa (tata sora), adegan kecap (tata kecap), adegan kalimah (tata kalimah), jeung adegan wacana (tata wacana). Ku ayana tata basa, panyatur basa digiring sangkan ngagunakeun basa kalawan bener tur merenah. Najan kitu, kaédah basa henteu nyungkeret atawa ngawatesanan kaparigelan panyatur basa dina paguneman sapopoé, tapi ngan ukur pikeun tatapakan sangkan larapna basa henteu salah.

Buku Tata Basa Sunda Kiwari disusun ku pakar basa katut pangajaran basa Sunda ti Jurusan Pendidikan Bahasa Daérah (Sunda) Universitas Pendidikan Indonésia. Atuh munasabah upama eusina kaitung keuna tur lengkep, boh kaédah-kaédahna boh conto-contona. Jaba ti pidangan kaédah jeung conto-conto anu geus baku, ieu buku téh dieuyeuban ogé ku conto nyata tur kaédah mutahir minangka dadaran makéna basa Sunda mangsa kiwari.

Ieu buku téh dipiharep bisa ngadeudeul pangajaran basa Sunda, siswa, mahasiswa, guru dosen, katut masarakat umumna, anu keur narékahan tur ngahangkeutkeun makéna basa Sunda anu bener tuh merenah. Tujulna bisa kahontal masarakat Sunda anu “hadé tata hadé basa”.

Adegan basa anu digambarkeun dina ieu buku ngajanggélék dina wangun pola-pola. Ngarumuskeun pola-pola téh didadasaran ku fénoména basa anu nyata; jadi, sipatna déskriptif. Najan kitu, teu kudu héran lamun aya data basa nu sipatna intuitif. Hall ieu dimeunangkeun lantaran nu nyusun ieu buku téh masih kénéh panyatur asli basa Sunda.

Conto-conto adegan basa anu dipidangkeun dina ieu buku dicutat tina wacana sastra, pangaweruh. Jeung warta anu gelar dina buku-buku, majalah, Koran, jeung hasil panalungtikan. Ieu buku dijudulan Tata Basa Sunda Kiwari. Ari sababna, eusina medar kaédah-kaédah basa anu kiwari diparaké ku masyarakat Sunda. Jaba ti éta, konsép, istilah, jeung rumus-rumusna ogé réa nu alanyar tur mutahir.